Ховар салым-чаяанныг хөөмейжини деткип ырак-чоок кожууннардан сурагжаан хөөмейжилер кээп, чагыг сөзүн база алгыш-йөрээлдерин сөңнээннер. Суг-Аксының чону изиг аъш-чемин делгеп, аалчыларны үрде көрбээн дөргүл-төрели ышкаш уткааннар.
“Чонум хөөнү хөөмейимге…” деп байырлыг хемчегниң кончуг чараш база онза кезээ хѳѳмей-сыгыт мөөрейи болган. Хѳѳмей-сыгытка онза чаяанныг күүседикчилерни илередир дээн мөөрейниң кол негелдези - «Тыва Республиканың улустуң хѳѳмейжизи», «Тыва Республиканың алдарлыг артизи», «Россия Федерациязының алдарлыг артизи» чергелиг хүндүлүг аттарның эдилекчизи кижи киржип болбас турган.
Хөөмейжилер, сыгытчылар, каргыраажыларның адаан-мөөрейиниң киржикчилери жюри кежигүннерин база көрүкчүлерни магададып, өгбелеривистен салгал дамчып келген, тыва чоннуң чоргааралы "хөөмей-сыгыт" сиңниккен чараш оюн-көргүзүгнү чыглып келген чонга мага хандыр бараалгатканнар.
Мөөрейниң түңнелдери-биле шаңналдарны дараазында киржикчилерге тывыскан:
Дээди шаңналга Мундукай Лопсан тѳлептиг;
I-ги чергениң Лауреады – Чооду Ачын;
II-ги чергениң Лауреады – Көшкендей Чолдуг;
III-кү чергениң Лауреады – Монгуш Артыш;
I-ги чергениң Дипломантызы – Ховалыг Эрес;
II-ги чергениң Дипломантызы – Тюлюш Отчурэн;
III-кү чергениң Дипломантызы – Чадамба Мерген-Херел.
Өгбелеривистиң чечен-мергенин сиңирип, сагыш-сеткилиниң күчү-күжүн шиңгээдип алган хөөмейжилеривис дараазында тускай шаңналдарны алган:
- “Хөөмейге йөрээл” деп тускай шаңналды Хертек Аңгыр-оол Каң-ооловичиге,
- “Чуртунга мактал” деп шаңналды Чулдум Ичин-Норбу Аясовичиге тывыскан.
Хүндүлүг Айхан Геннадиевич!
Силерниң тыва чоннуң сагыш-сеткил культуразын сайзырадыр база калбаа-биле нептередир ишке киирген улуг үлүг-хууңар онзалап, хөөмейниң тынын салбайн, ооң изиг судалы-биле амыдыралыңар доңнаштырганыңарга мөгейип, “Тыва Республиканың Улустуң хөөмейжизи” деп хүндүлүг ат алганыңарга улуг өөрүп, сеткиливис ханызындан изиг байырывыс чедирип тур бис! Амы-хууда бодуңарга база силерниң чоок улузуңарга улуг аас-кежикти йөрээп, каң дег быжыг кадыкшылды, келир үеде бедик чедиишкиннерни күзедивис!
 |
 |
.jpg)
