Ном саңының Артык Ховалыгның чогаал ажылдарын делгээн залга номчукчулар болгаш чогаалчының мөгейикчилери чыглып келген. Байырлыг езулалды Москвада Тыва чогаалчылар салбырының даргазы Борис Балчий-оол ажыдып, төпте чурттап турар тыва чогаалчыларның ажыл-чорудулгазы-биле таныштырган.
Сүт-Хөл кожууннуң, Бора-Тайга сумузунуң чагырга чериниң удуртулгазы, бора-тайгажылар ат-сураглыг чаңгыс чер-чуртуу-биле ужуражып, кадактарын сунуп, суй белектерин сөңнеп, чоргаарланып турарын онзалап демдеглээн.
Төлээлекчилер хуралының баштыңы Андрей Хертек Республика хүнүнге уткуштур Артык Ховалыгга база Борис Балчий-оолга "Сүт-Хөл кожууннуң хүндүлүг хамаатызы" аттарны тывыскан.
Улустуң чогаалчызынга "Бора-Тайга сумузунуң хүндүлүг хамаатызы" атты чагырыкчы Артур Ховалыг тывыскан.
Москвадан төрээн черинде чедип келген чогаалчы ном саңынга «Өндүр өкпең өң» деп сонет челээжин, «Дээрим – чаглаа, Черим – олбуу – бөдей Өөм» деп тоол чугаалар болгаш шүлүктер номнарын дамчыткан.
Авторнуң 18 дугаар «Дээрим – чаглаа, Черим – олбуу – бөдей Өөм» деп номунда Чеди чажыт ээзи Чанчып дээр оол дугайында, «Сүмбер-Уула хуулгаазын даг» деп тоолдар, Сүт-Хөлдүң тывылганының, кызыл даштың, Кызыл-Тайганың бажында байзазының, тыва өгнүң дугайында, ук черде чурттап турар төрел бөлүктүң төөгүзү киргенинден аңгыда, ыдык чер – Сүт-Хөлдү алгаан 44 шүлүк бар. Төрээн чуртун алгаан, төрел чонун мактаан, авторнуң чаңчыг-сагылгалыг шүлүктерин судурларга деңнеп болур.
Ховар салым-чаяанныг чогаалчы он чыл ажыг чурттуң төвүнде чурттап турар-даа болза, чону-биле харылзаазын үспейн, бодунуң күсели-биле номнарны үндүргеш, Тывазынче чорудуп берип турар.
#Сүт_хөлкожуун #Бора_тайга #Номсаңы
 |
 |
 |
 |
